Depressiýa —Siziň durmuşyňyzda päsgelçilik,bökdençlik döredip bilýän «ýagylaryň» biridir. Ol ünsüňi sowýar. Maksatlaryňy amala aşyrmaga kynçylyk döredýär. Ony ýeňmek hem şeýle bir çylşyrymly we kyndyr. Emma meşhur lukmanlaryň we psihologlaryň maslahatlaryna eýerip, bu beladan gutulyp bolar.

·        Sport bilen meşgullanmak. Fiziki işjeňlik, sport (30 minut) organizmiň «Bagtyň gormonyny», ýagny endorfiny bölüp çykarşyny 5 esse köpeldýär. Eger-de depressiýa bilen göreşýän bolsaňyz, onda size ýoga, aerobika ýa-da tanslar bilen meşgullanmak kömek edip biler.

·        Syýahatçylyk. Nätanyş ýerlere aýlanmak, täze adamlar bilen tanyşmak siziň emosional ýagdaýyňyzyň gaýtadan göterilmegine mümkinçilik berer. Depressiýa duçar bolsaňyz, onda ýekelikden gaça duruň. Hobbi, gyzyklanmalaryňyz bilen meşgullanmak, arassa howada aýlanmak size kömek edip biler.

·        Meditasiýa. Gündogar medeniýetiniň esasy aýratynlyklarynyň biri organizmdäki endorfiniň hem-de noradrenaliniň önümçiligini has-da güýçlendirýän meditasiýa medeniýetidir. Ol keýpi göterýän neýromediatorlaryň mukdaryny güýçlendirýär. Meditasiýa etmegi başarmaýan bolsaňyz, onda art-terapiýa, massaž, iňňe sünçmek ýaly sagaldyş medeniýeti bilen meşgullanyp bilersiňiz.

• Özüňe serenjam bermek. Depressiýanyň iň aýratyn häsiýetleriniň biri hem adamda parhsyzlygy ösdürýändigidir. Käwagtlar bolsa depressiýadaky adamlar öz daşky sypatyna hem parhsyz garap başlaýarlar. Dellekçä 1 aýlap barylmaýan wagty bolýar. Şeýle duýgulary başdan geçirýän bolsaňyz, gyssagly özüňize serenjam berip başlaň. Täze eşik alnyň, gözellik merkezlerine baryň... ýagdaýa görä siziň keýpiňiziň göterilýändigini görersiňiz.
• Sagdyn iýmit. Işdäňiz ýokmy? Nähili ýagdaý bolsa-da, hiç-haçan iýip-içmegiňizi bes etmäň. Iýip-içgiňizi azaltsaňyz, siziň immunitetiňiz peseler. Şeýlelik bilen, depressiýa wagty nahar iýip bilip bileňok, iýmeseň immunitetiň peselýär. Näme etmeli? Alymlar şeýle ýagdaýda köpräk gök önümleri, miweleri iýmegi maslahat berýär. Olar witaminlere baý bolup, siziň saglygyňyzy berkider hem-de keýpiňizi göterer.

Depressiýa düşen wagtyň durmuşyňa täsir etjek çözgütleri kabul etmeli däl. Daşky dünýäniň gözüňe üýtgeşik görünýändigini hem unutmaly däldir!

Şeýle-de depressiýa düşen wagtyň zyýanly endiklere bolan islegiň artýandygyny unutmaly däldir.Şeýle ýagdaýda nämä bolsa-da ünsüňizi sowuň hem-de başga zatlar bilen meşgullanyň!

Lukmanlara ýüz tutmakdan säginmäň

Depressiýa näme üçin howply? Ilki bilen bu kesele jemgyýetde kän bir ähmiýet berilmeýär. Adamlar fiziki taýdan sagdynlygyna üns berýärler. Şol bir wagtyň özünde ruhy näsazlyk sebäpli ähli keselleriň döräp bilýändigini ýatdan çykarýarlar. Şonuň üçin depressiýa bolan wagty lukmanlara ýüz tutmakdan çekinmäli däl. Gerek bolsa Psihoterapiýa we lukmanlaryň görkezmesi bilen dermanlary kabul ediň.