Soňky döwürlerde iş prosessiniň çylşyrymlaşmagy we iş orunlarynyň görnüşleriniň köpelmegi bilen iş orunlaryny, käbir ýagdaýlarda bolsa hünärini hem üýtgedýän adamlaryň sany barha köpelýär. Bu bolsa öz gezeginde hünärmeniň öňünde täze mümkinçilikleri açýar. Şol bir wagtyň özünde iş ýeriňi çalyşmak bar bolan "gapylary", ýagny mümkinçilikleri hem ýapyp biler. Şonuň üçin hem biz bu mesele boýunça ýörite hünärmenlere ýüzlenmegi makul bildik. 

Günbatar yklymynda zähmet çekýän hünärmenleriň berýän maglumatlaryna görä, adamlar iş ýerlerini birnäçe sebäplere görä üýtgedip bilerler. Emma olaryň arasynda iň esasysy zähmet hak meselesidir!

Iş berijileriň esasy meselesi kompaniýada birnäçe ýyl bäri zähmet çekýän tejribeli hünärmenleriniň zähmet hakyny galdyrmaýandyndadyr. Hünärmene bolsa gerek tejribesini gazanmak üçin 2-3 ýyl ýyl ýeterlik bolýar. Şeýle ýagdaýda onuň başlangyç aýlykda işläsi gelmeýär. Iş beriji bolsa aýlygyny galdyrmaýar. Bu bähbitleriň konflikti ahyrynda kompaniýanyň tejribeli işgärini ýitirmegine getirýar. 

Bilşimiz ýaly, her ýyl dünýäniň islendik jemgyýeti inflýasiýa hadysasyna sezewar bolýar. Şonuň üçin hem kompaniýalara işgärleriniň aýlygyny her ýyl 10 göterim töweregi ýokarlandyrmagy maslahat berýärler. Şeýle ýagdaýda işgäriň gazanan pulunyň maşgala dolanyşygyna ýeterlik boljakdygyny we süýşürip biljekdigi beýan edilýär.

Iş çalyşmak we işgäri taýýarlamagyň çylşyrymly prosessdigini nazarda tutup sazlaşykly we konstruktiw gepleşikleri geçirmegiň dogry boljakdygy bellenilýär. Siziň işiňizde şeýle ýagdaýlar boldumy we bu ýagdaýdan nähili baş alyp çykdyňyz?